Viu abr no lang nid aus

Öhm ja, auso. Es paar chlini Sache in Extremchurzform (gloubi dra?)

Es isch de mau d Blockwuche cho, wie immr si d Vorbereitigstage extrem spannend gsi, i bi mer vorcho wie früecher. Wo mer du när uf Paris si isches ganz anders gsi, scho im Zug isches luschtig gsi, d Lüt vo de Chör hei beidi gliichzitig ihri Liedli gsunge...
I wot nid lang stusse, und maches doch; ds Paris isches hölle kuul gsi, abr chaut, und ja mir si imne CHloschter gsi und i bi mit der Ines im Zimmer gsi (und ja, si schuudet mer scho sit Ewigkeite Föteli vo Paris: Schäm di Nüshu!! ) Öpis wetti da no bemerke, es het eini wo mit MissSixty u guudigem u rosa Züg umelouft dert müesse ga Converse All Stars choufe...naja (sorry, die Bermerkig het müesse si)

Nach däm Paris ha ni när e Wuche Ferie gha und i wett aso nid gfragt wärde was i denn gmacht ha...*schäm*. Mini MA-Präsentation isch du de gliiich no mau fertig worde, auso zwöi mau, ha se nämlech vorher no mau vernichtet *GGGGRRHHHRHH*.

Am Wiiikend (11.2/12.2) hei mer de es Wiiiikend gha, ja tönt toll i weiss, abr aui wo Insiders si wüsse gd ws gmeint isch. Auso, d Herre, das heisst der Simu u dr Herr Schoop hei mer nid zuetrout gha dass i früeh ufstah *tsö*. Da ha ni natürlech grad extra am haubi achti müesse mit ga ichoufe...oke, isch wou o besser gsi, wie wärs äch usecho ohni mi *simudiss*. Zu dene beidne ihrne sackmässige Meisterleistige spätr. Mir si de am Bahnhof acho, üsi Gööfis si cho, es paari hei grad knapp über ihres Gepäck chönne useluege. Im Heim (Grauhouz, dert ar Aare) isches de los gange. Es Glöif wi nüt. Wo ni de fang mau ha wöue z Züg zum Choche parat lege u d Nudle für ds Bami (jaja chli 0815 i weiss) nid ha gfunge und di beide Jungs bi ga frage hei si mi beidi agluegt aus wäri es Alien. Dr Henä: "öööh, (du bisch ja so blöd hätt ds söue heisse)für ds Bami brucht me ömu ke Teigware!" Jaja, i gloubes o fasch, nach öppe füf Minute und wo ni ne ds Rezept ha zeigt gha hei si mers de gloubt. Sövu zu de Säck. Ah nei, genau, bim Zvieri wärde Öpfu verteilt, di chliiine hei se aui nid gärn. "me tuet nid Züg furtschiesse wo me no cha ässe, die wärde iz gässe!". Hm ja, nachdem mir de festgsteut hei gha dass ds sackmässige Genie het Boskop (Chochöpfle) gchouft hei si se de gliich dörfe furtschiesse. Sövu zum Sack für ds 2te.
Aja, i ha ja gseit i stussi nid. De nume no es churzes Szeneli vor Touf; dr Simu und ig loufe zäme mitem Pixel, em WInnie-Pooh und em Flic-Flac zrüg (si si aui gd früsch touft). Dr Winnie-Pooh ma nüm. Dr Simu wot ne trage. Ig, idringlech: Simu, lüüüüpf ne nid, lüpf ne nid!!" So iz dörft der rate wrum er ne nid het söue lüpfe. Ds Weekend isch de o z End gange und Schlaf het müesse nacheghout wärde..

D MA-Präsentation ah ni o überläbt, obwou ir Pouse vorher no huere vili usem MNG (Dömu, Fixu etc) &Skinheads si cho..

Am Sunnti de das huere Voilà, und neeeei, mi Schueh isch nid ufem Dach glandet *düdüdü*

Die nächste Wuche si nid so spannend gsi, aso i erinnere mi ömu nüm. När isch de ds Deisswiler Weekend cho:
UNd wenn i das schribe ha ni grad es huere Smile druffe. I ha mi zersch huere gnärvt, wüu i nid ha gwüsst was i wot mache am Abe, aui hei am ne andere Ort häre wöue. U de hei du der Tomazobi u d Movienight müesse er Mühli Deisswiu wiiiche. Nachemne riisige Gstress zum abmache "iiih du tönsch ja komisch am TElefon" isch dr Simu mi de cho hole, er het vorher scho ds yäni ipackt gha.
De si mer när dert bir Mühli acho und dert isch de mitem orangelüchtende Ding am umewädle dr Dänu gsi. Zersch hei mer üs wöue aus dr anger us gä, auso i aus Yäni, und si aus ig, abr er het üs äbe mau ufemne Föteli gseh. Scheisse he! Nachdem mer no es Zitli dusse blöd hei umegstange si mer de mau ine. Zuefäuigerwiis (da isch de no ke Bezug zu de Zuefäu wo personifiziert no wärde fouge) het de dert Grey Monday gspiut und d Jacä isch o dert gsi. Da dr Dänu dert VIP isch gsi und üs immr Bier gliferet het isches de bim Töggele rächt luschtig worde und i ha für einisch nid der Ruef becho wo ni süsch aube bechume . Da mir scho vorsorglecherwiis der Schlafsach hei ipackt gha und dr Simu nid vom trinke hei wöue abhaute hei mer de dert pennet, d Gsprächli si chli öhm quer oder so gsi, und naja, wo de es paar no mitem Megafon si cho hei si ömu es paar Schueh zspüre becho. Nenei i stusse nid, nume damit ders ni vrgässet. So am 2 am nächste Tag bi ni de deheim gsi. U bi ga penne. Und ha vrpennt. Und zwar ds Chammrchorkonzert. *schäm*

Ds nächste Wucheend. Dir werdet nech huere frage, öb i chli spinne, abr äue scho. I bi ad Funkrooots. Wrum? Wüu d Ines u i hei gseit mer wöue wider mau ga. Scho wo mer üs ir Stadt hei troffe isch mers schlächt gsi und der Auk isch wou o nid so toll gsi dadruf. Nid viu gshaket, viu mit Yvi und Stuli duss umegstange. Eingch hätte mer ufe 2. Mooonliner wöue isch abr nid gange. U de si mer haut no blibe. Irgendwenn (...) isches mer de nüm schlächt gsi u mer si no chli umeghänget mitem Zuefau und sim Kolleg und hei töggelet, und dr Zuefau und ig hei gäge Blade gwunne (ha drum am WE vorher gäge ihn abgloset). Eingch hätti ja ufe nächst Moonliner wöue abr i ha mi när la überschnurre heizloufe und ufem Heiwäg isch em Zuefau si Heum nid nume einisch a Bode gheit...wenn i de när mau ids Bett bi wot i ja nid wüsse..
Ds nächste WE, Breakin Taboos-Chorkonzert. Isch no abgange. Life is not what it seems. U vili Lüt wo me kennt. D.zuestäng, Gwohnheite, Zuefäu etc..
Heiloufe wi öhm letscht Mau. Chli meh Auk. Bänkli. Chaut. Stägähuus. Da ha ni dänkt i la mau am yäni la lüte so zum Präsenz markiere, und när nimmt die am Morge am haubi sibni o no ab..heieiei. Und si het Frage gha...hehe. Am nächste Morge: vrwirrte zuefäuige Spaziergang. Verdrängig.

Nächst Weekend: Auso, i ga im Summer mit Yäni, Chrisi, Hörmi u Lärsu mit de Dütsche i ihres Bundeslager. Und zum das so chli bespräche si mer eis oder zwöi ga zieh. U mer hei beschlosse dass mer vorher no es paar Tag nach Berlin gö..süsch gits gloub ni viu gschiiids.

Näääär, am Donnsti isch Movienight im Chino Movie gsi. Isch auso de no lschtig gsi. The Big Lebowski, L.A. Crash (o.ä), Fight Club. Zmorge ir Mensa. Aui verpennt wi nüt. Höche Energydrinkverbruuuuch.... Wi viu mau i mir während em ganze Fritti ha gseit "Nei Nettlä, iz bhautisch d Ouge offe!" wot i gar nid versueche z zeue. AM Abe bi ni de ga hüete, i hätt eingch när no zum Colin wöue (i ha das WE nid furt dörfe und ha dänkt, ds merkt eh niemer) abr i ha när nüm möge, bzw i bi ipennt.

Bis hüt gits gloub nüm viu zsäge, ussert dass i grad eis Buech ha gläse vo 10 wo ni hätt söue, abr wenigstens bruchi iz nüm es schlächts Gwüsse zha wägem Blog...

Morn, auso übermorn, ja haut eifach am 14. April ga ni i Ufbou, ehrlech gseit schiissst mi rächt a, e Wuche dusse mitem Velo u so...abr s wird eh dr hammr...u de dänkt me nüm a die cheibe Säck oder..

Aja, i 16 Tag bi ni 18ni




*to be continued*

13.4.06 02:46

bisher 2 Kommentar(e)     TrackBack-URL


Mi (13.4.06 14:17)
Chasch du stusse!?
I chume nid nache


simu (17.4.06 21:31)
das isch iz aber nid fair, irgendwie bechöme i däm blog nume d seck ufe gring!:-)

u zu mire entschudigung wägde teigware: i lehre schlosser u nid choch!;-)

müli müessemr mau widr gäh!;-)

Name:
Email:
Website:
E-Mail bei weiteren Kommentaren
Informationen speichern (Cookie)


 Smileys einfügen